دونیا مەسعود
لرۆژا 25 ێ ئیلۆنا سالا 2017 پڕانیا خه‌لكێ كوردستانێ د ڕاپرسیه‌كا
ئازاد و دیموكراسى دا ب ده‌نگێ به‌لێ بۆ سه‌رخۆبوونا كوردستانێ ده‌نگ دا.
ره‌نگه بۆ وه‌ڵاتێن خۆدان سه‌روه‌رى و نه‌ته‌وه و ملله‌تێن دناڤ جڤاكێن پێشكه‌فتى دا ئه‌نجامدانا راپرسیا سه‌رخۆبوونێ پرۆسه‌یه‌كا نۆرمال بیت، لێ بۆ جڤاك و خه‌لكێ كوردستانێ ئه‌نجامدانا وێ راپرسیێ شۆڕه‌ش و هه‌ڵویسته‌كێ نشتیمانى و نه‌ته‌وه‌یى بوو، چونكى هه‌رێما كوردستانێ خودان تایبه‌تمه‌ندى یه ژلایێ جوگرافى و سیاسى و جڤاكى.
هه‌رچه‌نده ئارمانجا خه‌باتا سه‌د سالیا خه‌لكێ كوردستانێ بۆ سه‌رخۆبوونێ بوویه لێ ژبه‌ر كاودانێن تایبه‌ت و ره‌وشا سیاسى یا ده‌ڤه‌رێ و هه‌رێمایه‌تى ئه‌ڤ ئارمانجه هه‌تا راده‌یه‌كى ب نه‌په‌نى بوو و كار بۆ بده‌ست ئینانا ئارمانجێن دیتر دكر مینا ئۆتۆنۆمى و فیدرالى.
ئه‌ڤ ئارمانجه ژى پشتى ئیراقا نوو بده‌ست هات و هه‌رێما كوردستانێ بوویه هه‌رێمه‌كا ده‌ستوورى و دانپێدانكرى د ئیراقا فیدرال دا، لێ پشتى رابوونه‌ڤا ده‌ستهه‌لاتداریا ئیراقێ، ده‌وله‌تا ئیراقێ هه‌تا راده‌یه‌كێ زۆر مافێن هه‌رێما كوردستانێ یێن ده‌ستوورى بنپێكرن، له‌وما خه‌لكێ كوردستانێ نه‌چار بوو ب وێره‌كانه و ئاشكرا بریارێ لسه‌ر ئارمانجا خۆ یا چه‌ندین ساڵى بده‌ت، ئه‌و ژى سه‌رخۆبوونا كوردستانێ یه.
راپرسى شۆره‌ش و هه‌لویست بوو چونكى لسه‌ر ئاستێن نیڤده‌وله‌تى و هه‌رێمایه‌تى و ئیراقى و هه‌تا راده‌یه‌كى كوردستانى ژى دژبه‌ریا ئه‌نجامدانا ڤێ راپرسیێ كر، لێ خه‌لكێ كوردستانێ ب رێژه‌یا ( 92 % ) پشت به‌ستن ب مافێ خۆ یێ ره‌وا و رێنمایى و ئامۆژگاریێن جه‌نابێ سه‌رۆك مه‌سعوود بارزانى داكۆكى لسه‌ر هه‌ولا بده‌ست ئینانا مافێ سه‌رخۆبوونێ كر و ب وێره‌كانه ده‌نگێ خۆ گه‌هانده جیهانێ.
سه‌ركه‌فتنا پرۆسا راپرسیا سه‌رخۆبوونا كوردستانێ مه‌زنترین روودانا سیاسى یا د دیرۆكا ڤى سه‌رده‌مى یا كوردستانێ ، هه‌رچه‌نده ئارمانجا وێ بده‌ست نه‌هات ، لێ بریارا پرانیا خه‌لكێ كوردستانێ گه‌هشته جیهانێ و مه باوه‌ره ئه‌ڤرۆ یان سۆباهى ئه‌ڤ بریاره دێ بجهـ هێت و سه‌روه‌ریا ڤێ چه‌ندێ ژى بۆ جه‌نابێ سه‌رۆك مه‌سعوود بارزانى و پارتى دیموكراتى كوردستان دزڤریت.
سلاڤ ل ڤێ بیرهاتنا مه‌زن و دیرۆكى و هه‌مى سه‌به‌خۆخازێن كوردستانێ و هێز و ئالیێن پشكدار و پشته‌ڤان.
Comments are closed, but trackbacks and pingbacks are open.