شهاب ئاکرەیی
دیتنەکا زەلال بۆ وان بەڕێزێن دبێژێن “مللەتێ کورد نەیێ ئێکگرتی یە و هەژی سەرخوەبوونێ نینە!”، ب دیتنا من مللەتێ کورد یەکە و ئێگرتییە ل هەر چار پارچێن کوردستانێ، لێ پارتێن سیاسی و سەرکردێن وان دابەش و نە یەکگرتینە، مخابن هندەک ژ وان بەرژەوەندخواز و پارەپەرست و کرێگرتینە!.
بەرچاڤترین بەڵگەهـ ژی لسەر ئێکگرتنا مللەتی، ئەنجامێ ریفراندۆمێ بوو، کو مللەتی ب رێژا (٩٣٪)ێ و ب هەموو دلخوازی و وێرەکی دەنگ ب سەرخوەبوونێ دا، فەرە دەستخۆشیێ ل سەرۆک “مەسعود بارزانی” بکەم، کو بریارەکا راست و دروست و دیروکی یا پڕ وێرەکی دا، و ئەز باوەرم ل پارچێن دی یێن کوردستانێ ژی هەر دەمەکێ ریفراندۆم بهێتە کرن، دێ ٩٠٪ دەرباز بیت و هەمان ئەنجامێ هەرێما کوردستانێ هەبیت.
ئانکو سووچا مللەتی نینە و مللەت هەژی هەموو مافەکی یە، مللەت هەر وەکو خواندکارییە و پارتێن سیاسی و سەرکردە، خواندنگەهـ و مامۆستانە، دەما خواندنگەهـ یا بێ بەرنامە و رێ بەرزە بیت و مامۆستا یێ بێ ئامانج و شیان بیت، دێ خواندکار ژی یێن بێ ئاست و بێ هیڤی و بێزانین بن، ئانکو دێ مللەت بێ پاشەرۆژ و د دەردەسەریێ دا بیت.
بۆ نموونە، ئەرێ فەرمانبەرێن کی مللەتی د دەهـ هەیڤان دا سێ مووچە وەرنەگرتینە و خوڕاگر ماینە و پابەندی دەواما خۆ بووینە؟
“مللەتی ب رێژا (٩٣٪)ێ و ب هەموو دلخوازی و وێرەکی دەنگ ب سەرخوەبوونێ دا”
ئەرێ کی مللەتی ١٠٠ ساڵان ل بەرخودایە و لدژی چەوساندن و ستەمێ راوەستیایە و دەهان هزار جان گوری ئاخا وەلاتێ خۆ کرینە و بووینە شەهید، و هێش ب سەرخوەبوونێ شاد نەبووینە و سەرباری ڤێ ژی، هندەک سەرخوەبوونێ ژی بۆ کوردستانێ ب هەژی نەبینن ❗.
مخابن❗ کو پارتێن سیاسی هەر یەک لدویڤ قەبارێ خۆ، هاریکار نەبووینە د ئاڤاکرنا دەستوورەکی دا، کو نشتیمانپەروەریێ و نەتەوەخوازیێ و خیانەتێ ب دروستی پێناسە بکەن و بنڤیسن، چۆنکە، نۆکەری تشتەکە و وەلاتپارێزی تشتەکێ دی یە، رەخنەگرتن، بۆچوون، نەڕازیبوون، پەیوەندی یێن دبلوماسی و بەرژەوەندی و بازرگانی تشتەکە، و خۆفرۆشتن و خیانەت و نۆکەری و جاشایەتی، و رادەستبوون ب خواست و ڤاتنا دژمن و داگیرکەری ژی تشتکێ دی یە!.
هەر لەوا دڤێت جداهی دناڤبەرا وان دا بهێتە کرن، دیسان دڤێت لدژی دژمنایەتیێ، کولەتیێ، نۆکەریێ و ستەمێ، گیانێ برایەتیێ، ئازادیێ، وەلاتپارێزیێ و دادیێ بەرپا بکەین.
مخابن، پارتێن سیاسی یێن مە کوردا هەتا ڤێ گاڤێ چ دەستوور و یاسا ژبۆ دیارکرن و پێناسەکرنا بەرژوەندی یێن بلندێن کوردستانێ نینە، نە خیانەت و نە نشتیمانپەروەری، نەهاتینە نڤیسین و زەلالکرن!، ژبەرکو پارتێن سیاسی “یاسایێن یاریێ” ب دل و حەزا خۆ داناینە، گەلەک جاران ژی خیانەتێن مەزن، ب نشتیمان پارێزی هاتینە بناڤکرن، هەر ژبەر هەمان سەدەمێ نەبوونا دستوورەکی بۆ کوردستانێ.
ئەڤ ئامانج و بیرتەسکی و دابەشبوونا سیاسی، و پێشەنگی نەکرنا مللەتی ژ بۆ ستاندنا سەرخوەبوونێ، تاوانەکا مەزنە، هەمبەر خەباتا سەد ساڵێن رێککەفتنا لوزانێ، و ئەگەر بەردەوامی ب هەمان سیاسەتێ بهێتە دان، دێ باجەکا ب ئێش و گران لسەر ئاستێ نەتەوەیی هەبیت.
Comments are closed, but trackbacks and pingbacks are open.