هاشم عومەر کانی مازی
ل ١٩٠٣/٣/١٤ و ل ڕۆژەکا وەکی ئەڤرۆ، کاریگەرترین مرۆڤ د دیرووکا هەڤچەرخا مللەتێ کورد دا، د ناڤ سەخت و دژوارترین بارودۆخێ سیاسی، ئابۆری و کۆمەڵایەتی دا دهێتە سەر دنیایێ. ئەو مرۆڤێ ها بارزانیێ نەمر بوو.
ژ دایکبوونا بارزانیێ نەمر، ژبۆ گەلێ کوردستانێ هەلاتنا رۆژا ئازادیێ بوو، چونکە ئەو بوو کاراکتەرێ هەری گرنگ د ڕێرەوا بزاڤا نیشتیمانی و نەتەوەیا گەلێ کوردستانێ دا و بوو سیمبولێ بەرخودان و خۆڕاگریێ و ئومێدا پاشەرۆژا گەلێ کوردستانێ.
بارزانیێ نەمر پتر ژ نیڤ سەدەی، د هەستیارترین و ئالۆزترین قۆناغدا، ڕێبەریا بزاڤا رزگاریخوازیا گەلێ کوردستانێ کر و پێخەمەت داکۆکیکرنێ ژ مافێن ڕەوایێن خەلکێ کوردستانێ، بوو سەرمەشق و هڤێنێ کوردایەتیێ.
دیرووك دبێژیتە مە، ئەگەر بارزانیێ نەمر د ناڤ مللەتێ کورد دا هەلنەکەتبا، یان د ویستگەهەکی ژ ویستگەهێن خەباتێ دا، ڕادەستی ئیرادا داگیرکەرێن کوردستانێ ببا، نە کوردستانێ وەکو نیشتیمان و نە ژی کورد وەکو نەتەوە، شیانێن پاراستنێ ل هەبوونا خوە نەدمان، بەلکو دا ل سەر دەستێ داگیرکەرێن کوردستانێ هێنە ژناڤبرن.
لێ بارزانیێ نەمر، ب ئیرادەیەکا پۆلایین و ب باوەریەکا مکوم و خورستی و پێخەمەت بدەستڤەئینانا مافێن نەتەوی و نیشتیمانی و ڕزگارکرنا گەلێ کوردستانێ ژ ستەم زۆرداریا دوژمنێن داگیرکەر، درێژی ب کاروانێ خەباتێ دا و ب کاریزما خوە خەونا گەلێ کوردستانێ گەهاندە گوپیتکێ، هەتا وەلێهاتی، بزاڤا رزگاریخوازیا گەلێ کوردستانێ ب ناڤێ بارزانیێ نەمر بهێتە نیاسین. لەوما هەر خواندن و ڤەکۆلینەكا ل سەر دیرووکا بزاڤ و سەرهەلدان و شۆڕشێن گەلێ کوردستانێ ل سەدێ بیستێ بهێتەکرن، بێی ب جدی ڕاوەستان ل سەر ڕۆلێ مەزن و کاریگەرێ بارزانیێ نەمر د دێ کەڤیتە ژێر گومانێ.
بارزانیێ نەمر پشتی کو پتر ژ نیڤ سەدەی ژ ژیانا خوە ژبۆ خەبات و تێکۆشین و ڕزگارکرنا کوردستانێ و گەلێ خوە تەخانکری و پشتی کۆچا داویێ ژی کری، هەم د ناڤ گەلێ خوە دا و هەم ژی د ناڤ بیرەوەریێن شۆڕشگێر و ئازادیخوازێن جیهانێ ژی دا، مینا هێمایەکێ پیرۆزێ نەتەوی و نیشتیمانیێ گەلێ کوردستانێ ب نەمری دمینیت.
بارزانیێ نەمر بمەزنی ژیا و ب مەزنی و ب وژدانەکا ئارام و ئاسۆدە، پشتی ڕێبازەکا دەولەمەند و تژی حیکمەت و دادوەری و وێنێ هەری زەلالێ مرۆڤایەتیێ ل پاش خوە هێلای، ب ئێکجاری خاترا خوە ژ گەل و وەڵاتێ خوە خواست، لێ ئەو مینا سیمبۆلەکێ هەری پیرۆز جهێ خوە د ناڤ گەلێ خوەدا چێکر.
ل ڤێ بیرەوەریا پیرۆز سەرێ ڕیز و نەوزشێ بۆ بابێ رۆحیێ نەتەوا کورد بارزانیێ نەمر تەڤایا شەهیدێن کوردستانێ دچەمینن.
هزار سلاڤ ل ڕۆژا ژدایکبوونا بارزانیێ نەمر
هزار سلاڤ ل ٥٠ ی سالێن خەبات و تێکۆشینا بەردەواما بارزانیێ نەمر.
پارتی دیموکراتی کوردستان-لقێ ئێك
١٩٠٣/٣/١٤
Comments are closed, but trackbacks and pingbacks are open.