خورشید ئەحمەد سورچی
قەتەڕ ئێک ژوان وەلاتانە کو هەژموونەکا ئەقلیمی مەزن یا هەیی و دناڤ سیستەمێ ناڤدەوەلەتی ژی دا کارێکتەرەکا کاریگەرە ، پەیوەندیێن دناڤبەرا قەتەڕێ و هەرێما کوردستانێ دزڤڕنەڤە سالا ٢٠١٩ ، دەما کو وەزیرێ دەرڤەیێ قەتەڕێ سەردانا سەروکێ وی دەمی یێ هەرێما کوردستانێ ( سەرۆک بارزانی ) ــی کر و هەردوولایان جەخت لسەر هندێ کر کو دڤێت پەیوەندیێن هەرێما کوردستانێ و قەتەڕێ پێشڤەبچن و دڤێت کونسلخانا قەتەڕێ بهێتە ڤەکرن . پەیوەندیێن هەرێما کوردستانێ و قەتەڕێ پتر پەیوەندیێن بوارێ بازرگانی و گەشت و گوزارێ نە و تایبەت ڤەکرنا هێلا ئەسمانی دناڤبەرا قەتەڕێ و هەرێما کوردستانێ کو پتر دەرفەت ڕەخساند بو خوشکرنا پەیوەندیێن هەردوولایان . لدیف هندەک ژێدەران پەیوەندیێن بازرگانی دناڤبەرا عێراقێ و قەتەڕێ سالانە نزیکی ١٢٠ ملیون دولارە ، کو پشکا هەرە مەزنا ڤێ بازرگانیێ دگەل هەرێما کوردستانێ یە .
دناڤ پەیوەندیێن ناڤدەوەلەتی دا ڤەکرنا کونسلخانا وەلاتەکێ ژ وەلاتەکا دی مەرەم ژێ ئەوە کو پەیوەندیێن ئابوری و کەلتوری و بازرگانی …هتد ، بهێنە خوشکرن و پتر بوارێ دبلوماسی گەشە پێ بهێتە دان . هەروەکی یا دیارە کو هەرێما کوردستانێ پشتی کو دناڤ دەستورێ عێراقێ دا وەک قەوارەکا سیاسی و یاسایی هاتە چارچوڤەکرن پتر دەرفەت بو هەرێمێ دروست بوو کو بچتە دناڤ بوارێ دبلوماسیەتێ حەتا وەلێ هات کو پتریا وەلاتێن ئەقلیمی کونسلخانەیان ڤەکەن ل هەڤلێرێ . ڤەکرنا کونسلخانا قەتەڕێ دەستکەفتەکێ گرنگێ دبلوماسیە بو قەوارێ هەرێما کوردستانێ ، چونکی قەتەڕ وەلاتەکێ هەژموون دارە دناڤ پەیوەندیێن ناڤدەولەتی دا .
Comments are closed, but trackbacks and pingbacks are open.