سەردار هێتوتی
ڕۆژ بۆ ڕۆژێ، رەوشا دارایی بەرەڤ ئاقارێن تاری و نەدیار ددەتە ڕێ، زێدەتری سیهـ ساڵێن تژی ئەڤرازی و نشێڤی گەل و حکومەتێ ل باشوور دەرباز کرن، ئەڤ رەوش و خرابیا وێ دکەڤ سەر ملێن حکومەتێ د ئاستێ ئێکێ دا و پاشان ل سەر ملێت گەلی دمینیت چونکی هەر دوو لایەنان کار بۆ مووچەیێ بێ کاریێ کرییە.
زەڤیێن کوردستانێ پری بەرەکەتا خوەدایی نە، ل ڤان زەڤیان وەلاتێن زێدەتری چل ملیون کەسی دشێن لسەر بژین چونکی ئاخەکا ب بەرەکەت و ئاڤەکا شرین و سەقایەکێ باش هەنە و ئەگەر کارئاسانێ بهێتەکرن بۆ جۆتیارێ کوردستانێ دێ شێت گەهیتە رەوشا خۆ ژیاندنێ و وەرارا ئابووری، هەروەسا هەبوونا زۆزان و کوێستان و چیا و چەروانێ زۆر ژی ڕێکەکا دیترە بۆ دەلیڤێن کارێ بێ ڕاوەستان.
ژ بلی ڤان هەر دوو تایێن سەرەکیێن چاندنێ، هەبوونا چەم و رووبار و خوەزایێ بالکێشێ هەر چار دەمسالی، ڕێکێ ل هەمبەر تۆریزمێ و سەیران و گەریانێ هەم یا ناڤخۆ و هەم ژی یا دەرڤە ڤەدکەت کو ببیتە تایەکێ باش یێ خۆ ژیاندنێ.
ب رامانەکا کورت، ئەم دشێین بێی هەبوونا مووچە لێ ب پشتەڤانیا حکومەتێ بگەهینە ئاستێ خۆ برێڤەبرنێ لێ ب مەرجەکی کو حکومەت هاریکار بیت، نابیت ڕێک بهێتەدان گەنمێ سۆری و ترکی، باجانکا ترکی و ئیرانی، برنجێ هندی و تایلەندی و گەلەک و گەلەک تشتێن دیتر بهێنە ناڤا کوردستانێ و بێی هەبوونا چ ئاستەنگەکێ ببنە هەڤرکێت بەرهەمێت ناڤخۆیی.
د جیهانا ئەڤرۆ دا زێدەتری 820 ملیۆن کەس ل سەر ئاستێ جیهانێ ب دەست برساتیێ دنالن، وان کەسان هەم ژ لایێ دارایی و هەم ژی ژ لایێ جەستەیی ڤە شیانێن کاری نینە و نەشێن پێدڤیێن خۆ یێن ڕۆژانە ب دەستخۆڤە بینن، دا کو ئەم ژی ل باشووری بەرەڤ ڤی ئاقاری نەدەینە ڕێ یا فەرە ڕێکێن ئابوورا ئازاد یا کو تاک دشێت پێ بژیت بگرینە بەر و کار بۆ پێش بکەین.
د ڤان چار سالێت بووری دا، کابینا نوو ب سەرۆکاتیا مەسرۆر بارزانی سەرۆکێ جڤاتا وەزیرێن کوردستانێ شیایە چەندین کارگەهێن مەزن و بەنداڤ و پرۆژێن باش یێن ستراتیژی ئاڤا بکەت و مە هیڤیە ئەڤ ڕێکە یا بەردەوام بیت و کار بهێتەکرن خەلک دیر بیت ژ مووچەیێن کەرتێ گشتی و بشێن ب ئازادانە کارێن خۆ یێن بازرگانیا بچووک بڕێڤە ببەن.
Comments are closed, but trackbacks and pingbacks are open.