گەنجەکێ پیر و پیرەکێ گەنج

بێوار حەمدی

وەکۆ دیار دهەمی جڤاکان دا گەنج ستۆینا وەڵاتانە و وەڵات ۆ پێشکەفتن و بەرخۆدان و پێشڤەچۆن هەمی لسەڕ ملێن گەنجایە، بتایبەت گەنجێ کۆرد همی دەما بزاڤێن کارکرنێ وپێشڤەچۆنێ کرینە و هەستا پێکڤە ژیانێ و هەڤگرتنێ هەبۆیە، دەما کۆ زارۆکینی و سنێلەی ب دۆماهیک دهێت ژنۆی بۆهاڕەکا دی دەستپێدکەت کۆ ئەوژی ژیێ گەنجاتیێ یە،

دڤی ژی دا   شێوەیەکێ سرۆشتی هەمی گەنج تۆشی خۆشی ونەخۆشیان دبن، لێ دڤێت بزانین ڕامان ژ گەنجەکێ پیرو پیرەکێ گەنج چیە؟ هیچ گەنجەک ناخۆازیت د بۆهارا ژیێ خۆدا خۆ وەکۆ پیرەک بینیت لێ قەدەرو ژیانا وی جڤاکێ کۆ تێدا دژیت جاران نەچار دکەت کۆ هەست ب هێزۆ شیانێن خۆ نەکەت و ڕەنگە باوەری بخۆدان لدەڤ وی گەلەک لاواز ببیت، دیسان ب تایبەتی دنهادا کۆ ڕەوشا دارایی یا هەرێمی وکێمیا دەلیڤێن کاری و نە دامەزراندنێ وەکریە کۆ گەنج خۆ وەکۆ پیرەکی ببینیت یێ کۆ ژ هەمی هێزۆ شیانان ب دۆماهیک هاتی و چاڤەڕێیی دۆماهی ڕۆژێن ژیانا خۆیە، بێگۆمان ئەڤێ چەندێ ژی کارتێکرنەکا مەزن یا دەرونی وهزری بۆ گەنجی هەیە و تاکۆ کارتێکرنا مەزن ل جڤاکی دبیت، ژبەرکۆ وەکۆ مەگۆتی وەڵات ب گەنجان دهێنە بڕێڤە برن و گەنج ستۆینا وەڵاتانە، لێ هەردەما نەشیا بەرگریێ لسەر نەخۆشی و ژیارا خۆبکەت ئێکسەر دێ پەنایێ بەتە بەر نەمانێ یان ژی چۆنا ژدەرڤەی وەڵاتی و ل وی دەمی دێ بنە پاریێ بساناهی بۆ جهێن دیتر ودێ مفا ژ شیانێن وان هێتە وەرگرتن، لێ هەردەما کۆ پیرەک خۆ بگەنج بینیت ئەڤە ڕامانەکا دیترە، ژبەرکۆ جاران دێ بینن پیرەک یێ کۆ گەهشتیە دۆماهیا ژیێ خۆ وبۆهارا خۆ بدۆماهی ژی ئینای لێ دجەستەیێ گەنجەکی دا دژیت و هیچ جارەکێ ژی خۆ ب پیر نزانیت و ڕەنگە توڕە ژی بیت دەمێ کەسەک بناڤێ پیرەمێر گازی بکەتێ یان بێژیتێ ژیێ تە یێ مەزن بۆی، لەوما هەردەم خۆ دل تەڕ دبینیت و خۆدان دلەکێ خۆش ومەزن وبەردەوام حەزدکەت هەڤڕکیێ دگەل سۆحبەتێن گەنجان بکەت هەروەکی دژیێ وان ودلێ وان دا، ژبەرهندێ ژی دنۆکەدا یاب ساناهی نینە کۆ کەسەک ناسناڤێ گەنج وەربگریت ژبەرکۆ گەنجی دڤێت بژیت ب ژیانەکا خۆش و سەرفەراز نەک دجەستەیێ پیرەکی دا، ژبەرکۆ ئەگەر پیرەک خۆ وەکۆ گەنج ببینیت چ کارتێکرنێ ل ژیانا خۆ ناکەت لێ بەرۆڤاژی کارتێکرنێن نەرێنی یێن مەزن هەنە