سه‌رۆك بارزانی ب هه‌لكه‌فتا 30 سالییا راگه‌هاندنا هه‌رێما دژه‌فرینێ سوپاسییا وان وه‌لاتان كر یێن هاریكار بۆ دروستكرنا ده‌ڤه‌را ئارام، دوپات ژی كر كو هێشتا ترسه‌كا مه‌زن ل سه‌ر هه‌رێما كوردستانێ هه‌یه و داخواز كر پاراستنا كوردستانێ ژ ئه‌وله‌ویه‌تا هه‌ڤپه‌یمانان بیت.
سه‌رۆك مه‌سعوود بارزانی د گۆتاره‌كێ دا د ئێڤێنتا خودا ل دۆر 30 سالییا راگه‌هاندنا ده‌ڤه‌را دژه‌فرینێ یا ب رێیا ئه‌نترنێتێ هاتیه رێكخستن راگه‌هاند، ب درێژاهییا دیرۆكێ سته‌مه‌كا مه‌زن ل گه‌لێ كوردستانێ هاتیه كرن، به‌لێ ل وان سالێن رژێما به‌عس حكمرانیا عیراقێ كری كاره‌ساتێن مه‌زن ب سه‌ر گه‌لێ كوردستانێ دا هاتینه وه‌كو ئه‌نفال و كۆمكوژی و كیمیاباران.
سه‌رۆك بارزانی گۆت ژی: بریارا 688 یا دابینكرنا ده‌ڤه‌ره‌كا ئارام ده‌رفه‌ته‌كا زێرین بۆ گه‌لێ كوردستانێ په‌یدا كر و ئه‌و ترسێن هه‌یی ژی هه‌تا راده‌یه‌كی مه‌زن نه‌مان و خه‌لك ژی ڤه‌گه‌ریانه سه‌ر مال و مولكێن خو.
سه‌رۆك بارزانی سوپاسیا سه‌رۆك بۆش، سه‌رۆك میتران و مه‌دام میتران، سه‌رۆك ئۆزال، سه‌رۆكوه‌زیران جۆن مێجه‌ر كر بۆ هه‌لویست و بریارا وان یا وێره‌ك، كو پشتێ وێ بریارێ گه‌لێ كوردستانێ شیا ئیدارا خو بكه‌ت و داموده‌زگه‌هێن شه‌رعی دامه‌زرینیت و هه‌لبژارتنان بكه‌ت و په‌رله‌مان وحكومه‌تا هه‌رێما كوردستانێ پێكبینیت و كوردستان بوویه په‌ناگه‌هه‌ك بۆ هه‌مى لێقه‌وما و خه‌باتكارێن عیراقێ.
سه‌رۆك مه‌سعوود بارزانی گۆت ژی: نوكه ژی گه‌لێ كوردستانێ نه‌گه‌هشتیه هه‌مى ئارمانجێن خو و قۆناغا دوماهیێ، هێشتا ترسه‌كا مه‌زن ل سه‌ر هه‌رێما كوردستانێ هه‌یه، داخواز ژی كر پشته‌ڤانی و هاریكاری دبه‌رده‌وام بن و هیڤیی خواست پاراستنا خه‌لكێ هه‌رێما كوردستانێ ژ ئه‌وله‌ویه‌تا وان بیت.
Comments are closed, but trackbacks and pingbacks are open.