باڵیۆزخانا بریتانیا ل بەغدا تویتەك دهژمارا خۆ یا تایبەتدا لسەر تۆڕا كۆمەڵایەتییا تویتەری بەڵاڤكر وتێدا ڕاگەهاند، دكۆمبوونا خۆدا گرووپێ (جی 7) پەسنا سوپایێ عیراقێ و هێزێن پێشمەرگەهێ كوردستانێ كر دشەڕێ دژی داعشدا.
ل گورەی وی تویتێ باڵیۆزخانا بریتانیا بەڵاڤكری، گرووپێ (جی 7) ڕۆلێ سوپا و هێزێن ئەمنیێن عیراقێ ب هێزێن پێشمەرگەهی ڤە بلند هەڵسەنگاندییە دشەڕێ دژی ڕێكخستییا داعشدا، و دووبارە پشتەڤانییا خۆ دووپاتكرییە بۆ هەوڵێن حكومەتا عیراقێ دبوارێ پاراستنا دەڤەرێن ژ دەستێ داعش هاتینە ئازادكرن، و دیسان پاڵپشتییا خۆ بۆ سەروەری و سەربخۆیی و ئێكپارچەیا ئاخا عیراقێ ڕاگەهاندییە.
دكۆمبوونێن خۆدا ئەوێن ل 11 هەتا 13 ڤێ مەهێ ل دەڤەرا كۆرنووڵ ل بریتانیا ئەنجامداین، گرووپێ (جی 7) پشتەڤانییا خۆیا تمام بۆ بڕیارا ژمارە 2576 یا جڤاتا ئاسایشا نێڤدەولەتی دەربڕی، بۆ بەشداریپێكرنا چاڤدێران دهەلبژاردنێن عیراقێدا، كو مەبەست ژێ هاریكاری و مسوگەركرنا ئەنجامدانا پڕۆسەكا ئازاد و بێ فشار و سەختەكارییە، و دیسان داخواز ژ خەلكێ عیراقێ كر بەشداریێ دپڕسا هەلبژاردناندا بكەن.
گرووپێ (جی7) كو ژ كەنەدا، فرەنسا، بریتانیا، ژاپۆن، ئیتالیا، ئەمریكا و ئەڵمانیا پێك دهێت و ب حەفت وەڵاتێن پیشەسازیێن دیموكراسیێن جیهانێ دهێتە نیاسین، ل 11 هەتا 13 ڤێ مەهێ كۆمبوونا خۆ ل دەڤەرا كۆرنووڵ ل بریتانیا ئەنجامدا، و دكۆمبوونێدا پرسێن چاوانەتییا دابەشكرنا ڤاكسینێ دژی كۆرۆنا ب یەكسانی، و گوهڕینكاریێن سەقای، و ڤەژاندنا ئابووری، سەپاندنا باجێ لسەر دامەزراوێ فرەهـ ڕەگەز و هاریكاریكرنا وەڵاتێن هەژار گەنگەشە كربوون.
Comments are closed, but trackbacks and pingbacks are open.