ب ناڤێ خودێ مەزن و دلۆڤان
پشتی رویدانێن ئە‌فغانستانێ ماوێ چە‌ند رۆژایە بزاڤە‌كا سیاسی و میدیای ب ئاراستێ دروستكرنا ترس و بێ ھیڤیبوونێ دناڤ خە‌لكێ كوردستانێ دا كار ژ بۆ ھە‌ڤبە‌ركرنا ھە‌رێما كوردستانێ و ئە‌فغانستانێ دكە‌ن. ل ڤێرێ پێدڤی یە ھە‌می لایە‌ك باش بزانیت كو ھە‌ر مللە‌تە‌كێ پشتا خۆ ب خۆ و شیانێن خۆ گە‌رم نە‌كە‌ت ھە‌می دە‌مان ئە‌گە‌رێ گە‌ف و ژناڤچوونێ ل سە‌رە. پشتە‌ڤانیا خە‌لكی ژی وی دە‌می بھایێ خۆ ھە‌یە و دێ یا كاریگە‌ر بیت ئە‌و گاڤا ئە‌م ھە‌بین و مە ئیرادە ھە‌بیت.
جوداھیە‌كا مەزن دناڤبە‌را ئە‌فغانستان و كوردستانێ دا ھە‌یە. جوداھیە‌كا گە‌لە‌ك ژی دناڤبە‌را پێشمە‌رگە‌ی و سۆپایێ ئە‌فغانستانێ دا ھە‌یە. پێشمە‌رگە بە‌رھە‌مێ مێژوو و خوین و روندكێن گە‌لێ كوردستانێ یە. خودانا سە‌دان داستانێن مێژووی و قارە‌مانانە‌یە. نموونە ژی داستانا كۆڕێ و شكاندنا ئە‌فسانە‌یا داعش و داستنانێن پردێ و سحێلا كو دوژمنێن كوردستانێ پلان ھە‌بوو ئیرادا مللە‌تێ كورد بشكێنن. بە‌لێ پێشمە‌رگە‌ی و گە‌لێ كوردستانێ ب خۆراگری و ئیرادا پویلایی پیلانا نە‌یاران ژناڤبر.
ل ڤێرێ من دڤێت خە‌لكێ كوردستانێ پشتراست بكە‌م كو رە‌وشا كوردستانێ جوداھیە‌كا مەزن ھە‌یە لگە‌ل ھە‌می جھێن دی. سوپاس بۆ خودایێ مەزن مە پێشمە‌رگە‌یێ قارە‌مان و ھێز ھە‌یە و یا ژ ھە‌میێ ژی گرنگتر مللە‌تە‌كێ خودان ئیرادە و قە‌زیە‌ینە. ئە‌گە‌ر دوژمن و نە‌حە‌زان خە‌یالا ھندێ ھە‌بیت كو خە‌لكێ كوردستانێ بئێشینن چ جارە‌كێ ب ساناھی بۆ وان نە‌چوویە سە‌ری و، ب پشتراستی ڤە د پاشە‌رۆژێ ژی دا بۆ وان ب ساناھی ناچیتە سە‌ری. ھە‌ر كە‌سە‌كێ بڤێت ژی بێھیڤیبوونێ و خۆ ب كێمزانین و ھە‌ڤبە‌ركرنێن نە دجھێ خۆ دا دناڤ خە‌لكی دا بە‌لاڤبكە‌ت دیارە ھێشتا نە‌شیایە د ئیرادە و خۆراگرییا گە‌لێ خۆ بگە‌ھیت.
مە‌سعود بارزانی
٢٢ـی تە‌باخا ٢٠٢١
Comments are closed, but trackbacks and pingbacks are open.