شرنەخێ ترۆمبێلەکێ زاروکەکێ دا گیانێ خۆ ژ دەستدا

زێ بادینان

ناڤچەیا ھەزەخێ یا سەر ب پارێزگەھا شرنەخێ یا باکورێ کوردستانێ، ترۆمبێلەکا زرخی یا لەشکەری ل زارۆکەکێ دا و د ئەنجامێ دا وی زارۆکی جان دا.

ل گۆر زانیاریان، دوهی ل دەمژمێرێن ئێڤاری دا، ترۆمبێلەکا زرخی یا لەشکەری یا ئارتێشا ترکیێ، ل تاخا تورگوتۆزال یا سەر ب ناڤچەیا ھەزێخێ یا شرنەخێ ڤە، ل زارۆکێ ب ناڤێ مهراچ مرۆگلویێ تەمەن 7 سالی دایە.

پشتی بوویەرێ، کەسووکارێن وی مھراچ مرۆگلو برە نەخوەشخانەیا دەولەتێ یا ھەزەخێ، لێ تەڤی ھەموو ھەولدانان نەھات رزگارکرن و مرۆگلو ل نەخوەشخانەیێ جان دا.

زانیاری ددەن زانین، دەما ئەو زارۆک ل سەر بایسکلا خوە ترۆمبێلا زرخی ل وی دا و ھەروھا پشتی بوویەرێ بەشەکێ زێدەیێ خەلکی و کەسوکارێن وی زارۆکی، لگەل رێخستنا پارتیا ھەدەپێ یا وێ ناڤچەیێ  بەر ب نەخوەشخانەیێ ڤە چوونە.

ل ئالیێ دی پارتیا دەمۆکراتیکا گەلان (ھەدەپێ) دەربارێ بوویەرێ دا ل سەر حەسابا خوە یا تویتەرێ داخویانیەک بەلاڤ کر و ئەو بوویەر وەکو “کۆمکوژی” ب ناڤ کر.

ھەدەپە د داخویانیا خوە دا دبێژیت، “ئیرۆ ل ناڤچەیا ھەزەخێ زارۆکێ 7 سالی یێ ب ناڤێ مھراچ مرۆگلو، کو وەسەیاتا زرخی ل وی دا بوو، ھاتە کوشتن. ئەو بوویەرێن ترافیکێ یێن کو ب وەسایەتێن لەشکەری، ل باژارێن کوردان پێک تێن و د ئەنجامێ دا دبنە سەدەما مرنان، نە بوویەرێن ترافیکێ نە، کۆمکوژی نە. ئەڤە بوو کۆمکوژیا چەندان یا زارۆک، ژن و کالان؟ ئێدی بەسە!”