دەزگەهێ مێدیایێ زێ بادینان :
سەرۆکێ ئسرائیلێ راگەهاند؛ ئسرائیل دەستێ ئاشتیێ بۆ داخوازیا کەسایەتیێن ئیراقی یا گرێدانا پەیوەندیان ل گەل وەلاتێ وی درێژ دکەت.
نافتالی بێنێت، سەرۆکوەزیرێ ئسرائیلێ پشتی کۆمبوونا ژمارەکا کەسایەتیێن ئیراقی و دخوازکرنا گرێدانا پەیوەندیان ل گەل ئسرائیلێ گۆت: ب سەدان کەسایەتیێن ئیراقی یێن شیعە و سونە داخوازا پەیوەندیێن ئاشتیێ ل گەل ئسرائیلێ کریە، ئەڤ داخوازیە ژ ناڤا خەلکی هاتیە کرن نەک حکومەتێ و دانپێدانە ب وێ زولما دیرۆکی یا ل جوهیێن ئیراقێ هاتیە کرن.
بەری دو رۆژان ل هەولێرێ ب ئامادەبوونا ب سەدان کەسایەتی و سەرۆکهوزێن ئیراقی ل هەولێرێ، کۆنفرانسەک دەربارەی ئاشتی و پێکڤەژیانێ هاتە کرن و هندەک ژ پشکداران داخوازا گرێدانا پەیوەندیان ل گەل ئسرائیلێ کریە، پشتی وێ کۆمبوونێ حکومەتا ئیراقێ نەرازیبوونا خۆ دیار کر و حکومەتا هەرێما کوردستانێ ژی دیار کر کو ئەو کۆمبوونە دویر ژ هەلویستێ فەرمی یێ حکومەتێ یە و هەلویستێ وان گرێدای دەستوورێ ئیراقێ یە بۆ کەیسا ئسرائیلێ.
هەرێما کوردستانێ ل سەر ئاستێن سەرۆکاتیا هەرێمێ، حکومەتا هەرێمێ، و وەزارەتا ناڤخۆ بەیانێن جودا دەرکرن و دیار کر: رێپێدان ب وی کۆنفرانسی نە ژ بۆ وێ یەکێ بوو بەحسێ ئاساییکرنا پەیوەندیێن ئیراقێ و ئسرائیلێ بهێتە کرن، بەلکو کۆنفرانسەک بوو دەربارەی پێکڤەژیانێ و گۆتنێن د وی کۆنفرانسی دا هاتینە گۆتن، دەربڕینێ ژ هەلویستێ فەرمی یێ هەرێما کوردستانێ ناکەن.
Comments are closed, but trackbacks and pingbacks are open.