وەزارەتا کارەبێ ، هژمارەکا بریاران دەرکرن

وەزیرێ کارەبێ یێ هەرێما کوردستانێ ئەڤرۆ ل گەل ژمارەکا رێڤەبەرێن سەر ب وەزارەتێ و کۆمپانیا دانانا پیڤەرێن زیرەک کۆم بوو و ژمارەکا بڕیاران بۆ بلەز ب ڕێڤەچوونا دانانا پیڤەرێن زیرەک ده‌رئێخستن.

وەزارەتا کارەبێ یا حكومه‌تا هەرێما کوردستانێ راگەهاند: پشتی دوهی رۆژا ئێکشەمبی 17-10-2021 کەمال محەمەد، وەزیرێ کارەبێ یێ هەرێما کوردستانێ سەرەدانا پارێزگەها دهۆکێ و ئیدارەیا سەربەخۆ یا زاخۆ کری، ئەڤرۆ رۆژا دوشەمبی 18-10-2021 ل گەل ژمارەکا رێڤەبەرێن سەر ب وەزارەتێ كۆمبوو کو رێڤەبەرێن ئای تی، به‌لاڤكرن، ڤەگوهاستن، کۆنترۆل، پۆلیسێن کارەبێ هەروەسا لژنەیا بلند یا پیڤەرێن زیرەک و نوینەرێن کۆمپانیا تی ئێل یا بجهئینانا پرۆژەیێ دانانا پیڤەرێن زیرەک بوون پێخه‌مه‌تى بلەز ب ڕێڤەچوونا دانانا پیڤەرێن زیرەک بۆ هەمی وەلاتیان و ئەڤ بڕیارێن ل خوارێ ده‌رئێخستن:

1- ل دەمێ ژ کارکەفتنا پیڤەرێن زیرەک، کۆمپانیا بجهئینەر پیڤەری بۆ وەلاتیان ناگهوڕیت، پێدڤیە رێڤەبەریا بەلاڤکرنا کارەبێ پیڤەری بگهوڕیت.

2- دەستهەلات ب رێڤەبەریێن بەلاڤکرنا کارەبێ هاتەدان ل گەل کۆمپانیا بجهئینەر پیڤەران دابنن.

3- بۆ کێمکرنا دەمێ کارکرنێ، بریار هاتەدان لژنەیا سەرپەرشتکارا پرۆژەی و لژنەیا رادەستکرنا کاری ببنە ئێک لژنە.

4- پلانا نەهێلانا رۆتینێ د پرۆژەیى دا دێ هێتە دانان و بجهئینان.

5- هەر پیڤەرەکێ تێک بچیت و بهێتە چاککرن، پێدڤیە ئەگەرێ تێکچوونا وی بهێتە دیارکرن.

6- پشتەڤانیا تەمام یا وان کارمەند و فەرمانبەران بهێتەکرن یێن ب خەمخۆری و دلسۆزی کارێن خۆ ب ڕێڤەدبەن و ب رەنگەکێ بەروڤاژی، کەسێن خەمسار بهێنە سزادان.

7- هەر حەفت تا دەهـ رۆژان راپۆرتەکا تایبەت ل سەر چەوانیا کارکرن و ب ڕێڤەچوونا پرۆژەی بهێتە دیارکرن.

ئارمانج ژ دانانا پیڤەرێن زیرەک کێمکرنا مەزاختنا کارەبێ و نەهێلانا ب هەدەردانا کارەبێ یە، داکو دەمژمێرێن دانا کارەبێ بهێنە زێدەکرن.