ئالا.. هێما و ناسنامە و سومبولا گەل وەلاتانە ، دەربرینێ ژ تایبەتمەندین سیاسی و جوکرافی و مێژووی وسڕوشتی یێن هەر وەلاتەکی دکەتن و لسەرانسەری جیهانێ هەر وەلاتەکی ئالایئ خو یێ تایبەت ب شێواز و رەنگ و هێمایێن جیاواز هەیە پئ دهێنە نیاسین و شانازیێ پێ دبەن ، مە کوردان ژی هەر چەندە ب مخابنی ڤە حەتا نوکە چ دەولەتێن سەربەخو و تایبەت ب نەتەوا کورد ڤە نینە ودیسان نەبوینە ئەندام ل نەتەوێن ئێکگرتیدا کو ئالایێ خوە ل رێزا ئالایێن جیهانێ بەرز و بلند ببینین لێ ب سایا قوربانیدانا نیشتمانپەروەرێن ڤی وەلاتی و خوینا شەهیدا مە قەبارەکێ سیاسی و پێشکەفتی ل باشورێ کوردستانێ هەیە ب ناڤێ ( هەرێما کوردستانێ) کو بویە تەنها پارچە خاکا ئازاد بو گشت کوردان کو تێدا هەست ب ئارامیێ و سەروەریێ و شکومەندیێ بکەن ودیسان مە ئالایێ خو یێ تایبەت و دانپێدان کری هەیە ب شانایڤە ل دام ودەزگا و کوچک و تەلارێن جیهانێ بلند دهێتە دیت،
ئاڵا نەبتنێ پەروکەکا رەنگین و نەخشینە ل هەلکەفت و بیرەوەریاندا بهێتە بلندکرن و سڕوودێن نیشتمانی لبەر بهێنە گوتن بەلکی پیروزیەکا نیشتمانی یە ب ماندیبوون وب خوینا شەهێدا هاتیە پاراستن و ل ژێر سیبەرا ئالایی مەزنترین داستان هاتینە تومارکرن لەوما پاراستنا ئاڵای وبلند راگرتنا یادا وێ یا نیشتمانی ئهركەکێ نهتهوهیی و نیشیمانیێ هەر تاكەكێ کوردستانیە پێدڤییە شکومەندیا ئالای ب پیروزی بهێتە راگرتن ، وهەر ژبو ڤێ مەبەستێ ب خوشحالی ڤە لسالا 2009 پەرلەمانێ کوردستانێ وەک رێزگرتن بو پیروزیا ئالای روژا ١٧ کانونا ئێکێ ل هەر سال کریە روژا نیشتمانی یا ئالای کو هەڤدەم بوویە دگەل روژا بلندکرنا ڤی ئالای ل دامەزراندنا ئێکەمین کومارا کوردستانی ل مهابادێ لسالا 1946 ودیسان هەڤدەم بوویە دگەل یادا ژدایک بوونا جەنابێ (سەروک بارزانی) ل ژێر سیبەرا ڤی ئالایێ پیروز ل مهابادێ کو ب رێزگرتن ڤە جەنابێ وی کەرەمدکەت وە دبێژیت ( ئەز ل کومارا کوردستانێ ل مهابادێ ل ژێر سیبەرا ڤی ئالای ژ دایک بوویمە و لژیر سیبەرا ئالای کوردستانا سەربەخوو ئامادەمە بمرم ).
هەر بەرز و بلند بیت شکویا ئالایێ کوردستانێ ل هیڤیا هندێ کو روژەکا نیشتمانی بو پێشمەرگەی ژی بهێتە دیارکرن ژ بەرکو ئالا و پێشمەرگە دوو ژ سومبولێن پیروزێن نیشتمانی نە پێدڤیە ب سەربەرزیڤە رێز لێ بهێتە گرتن
