بەرپرسەکێ کورد ل ئەلمانیا راگەهاند، کو پشتی هەلبژارتنێن ڤێ دووماهیێ ل تورکیا رێژەکا بەرچاڤ ژ وەلاتیێن کورد ل تورکیا بەرێ خوە ددەنە ئەلمانیا و داخوازا مافێ پەنابەریێ دکەن، لێ نها رێژەکا زێدە ژ داخوازیێن کوردان ژ ئالیێ حوکمەتا ئەلمانیا ڤە دهێتە رەتکرن.
جاهید باشار سکرتێرێ جڤاتا کورد ل ئەلمانیا راگەهاند، پشتی سەرکەفتنا ئەردۆغانی د هەلبژارتنێن ڤێ دووماهیێ ل تورکیا دا، رەوشا تورکیا و ب تایبەتی ژی یا کوردان باش نینە، نها ژ بەر ئەگەرێن سیاسی و هەروەسا ژ بەر نەبوونا دەلیڤێن کاری رۆژانە وەلاتیێن کورد یێن ل تورکیا ب رێیێن جودا جودا بەرێ خوە ددەنە ئەلمانیا و داخوازا مافێ پەنابەریێ دکەن، د چەند مەهێن دووماهیێ دا رێژەکا گەلەک زێدە ژ وەلاتیێن کورد ل تورکیا بەرێ خوە داینە ئەلمانیا و گۆت: (حوکمەتا ئەلمانیا نها پتر ژ هەر دەمەکێ داخوازیا کوردان رەت دکەت، چونکی گەلەک ئەگەرێن خوە یێن جودا هەنە، ئەلمانیا وەسا دبینیت یێن داخوازا مافێن پەنابەریێ دکەن ئاریشەکا وان یا وەسا مەزن ل تورکیا نینە و دشێن ل وی وەلاتی بژین، هەروەسا ژ بەر قەیرانا ئابووری یا ل ئۆرۆپا ژی ئێدی وەلاتێن ئۆرۆپا ناخوازن وەکو جاران مافێ پەنابەریێ بدەنە هەر کەسەکێ، ژ بەر هندێ ژی نها رەوشەکا گەلەک تایبەت ل ئۆرۆپا هەیە، وەرگرتنا مافێ پەنابەریێ گەلەک ب زەحمەت کەفتیە و ڤێ یەکێ کاریگەریا خوە ل کوردان کریە، چونکی براستی ژی گەلەک ژ وەلاتیێن کورد ل تورکیا ژ نەچاریێ بەرێ خوە ددەنە ئەلمانیا و وەلاتێن دی یێن ئۆرۆپا، لێ مخابن نها رەوش ل ئۆرۆپا ژی بۆ کوردان وەکو بەرێ نەمایە).
زانایێ کورد و مامۆستایێ زانکۆیێ ل ئەلمانیا د. یاشار ئایدن ژی راگەهاند، گەلەک ئەگەر هەنە ئەڤرۆکە کورد ل تورکیا و هندەک وەلاتێن دی بەرێ خوە ددەنە ئەلمانیا، لێ پشتی شەرێ ئۆکرانیایێ رەوش ل ئۆرۆپا ژی هاتیە گوهۆڕین و ژیان ل ئۆرۆپا ژی گەلەک یا ب زەحمەت کەفتیە، ژ بەر هندێ ژی وەلاتێن ئێکەتیا ئۆرۆپا ب تایبەتی ژی وەلاتەکێ وەکو ئەلمانیا ئێدی نەشێت وەکو بەرێ هەر کەسەکێ وەکو پەنابەر قەبوول بکەت، د چەند مەهێن دووماهیێ دا رێژەیا وەرگرتنا پەنابەریێ بۆ کوردان گەلەک کێم بوویە و ژ هەر سەد وەلاتیێن کورد یێن کو ژ تورکیا هاتینە و ل ئەلمانیا داخوازا مافێ پەنابەریێ کرینە تنێ ٤ کەس هاتینە وەرگرتن کو ئەو یەک ژی رێژەکا گەلەک کێمە.
چاڤدێرێن سیاسی ل ئۆرۆپا ژی دیار دکەن، نها رەوش وەکو جاران نەمایە، ژیان بۆ خەلکێ گەلەک ژ وەلاتێن ئۆرۆپا ژی یا ب زەحمەت کەفتیە، ژ بەر هندێ ژی گەلەک سروشتیە هەکە هندەک ژ وەلاتێن ئۆرۆپا ئێدی بەرهەڤ نەبن وەکو بەرێ مافێ پەنابەریێ بدەنە وەلاتیێن بیانی.
Comments are closed, but trackbacks and pingbacks are open.