دیدار; زیاد عبدلکریم سلێڤانەی:
ئەڤرۆ د باژێڕێ زاخۆدا گەنجەک هەیە خودان بەهرە و شیانە ب تبل ب ژەنینەکا جودا و ب دەنگەکێ زەلال پێدڤی ڕەنگڤەدانا هونەری و بەهرەیا ئەوی د ناڤا باژێراندا بکەت.
کورتییەک ل دۆر ژیانا هونەرمەندێ گەنجێ باژێڕێ زاخۆ (سەباح حەسەن ساڵح).
سەباح حەسەن ساڵح، ٦ ێ تەباخا ١٩٩١ ل تاخێ تلکەبەرێ ل زاخۆ ژدایکبوویە. خواندنا خۆ ل ١٩٩٧ ێ دەستپێکرییە و قۆناغا بنەرەتییێ ل قوتابخانەیا (تلکەبەر) کو نوکە (شەڤین) هاتییە ب ناڤکرن تەواو کرییە. هەروەسا ل سالا ٢٠٠٣ێ قۆناغا ناڤنجییێ ل قوتابخانەیا (جودی) کو ئەو ژی نوکە ب (ژین) هاتییە ناڤکرن. دیسان قۆناغا ئامادەییێ ژی بەشێ وێژەیی ل قوتابخانەیا (بەدرخان) یا ئامادەیی ب دووماهیک هیناتییە. نوکە قوتابییێ پەیمانگەها (ڤیا) یە یا هونەرێن جوان ل پشکا مۆزیکێ دخوینیت.
(سەباح حەسەن ساڵح) ی گۆت ” هەر ل زارۆکینییا خۆ، ل قۆناغا دەستپێکێ ژ خواندنا خۆ یا سەرەتایی، من هەستپێکر کو بەهرەیەکا هۆنەری دەڤ من هەیە”.
دیسان د ناڤا ئاخڤتنێن خۆدا دیار کر کو ئەڤ چەندە هەمی ژبۆ بابێ ئەوی ڤەدگەڕیت و گۆت “بابێ من، کارتێکرنەکا ڕاستەوخۆ ل سەر من هەبوویە، چونکی بابێ من ژ چێرۆکبێژێن زیرەک و ژێهاتی بوو”. خەلکەکێ ژبۆ بووراندنا شەڤێن درێژ، شەڤا خۆ ب گوهداریکرنا چەند چیرۆک، ئەفسانە و … دبووراند. ژبەرکو د ئەوان سالاندا کارەب یا کێم بوو. هەروەسا ئامیرە و تەکنۆلۆجییا ژی نەبوون یان ژی گەلەک کێم بوون.
دیسان گۆت ژی “ل ناڤ ئەوان چیرۆکێن کو بابێ من دگۆتین، ستران ژی هەبووینە. هندەک جاران ئەو چیرۆکە ب سترانکی دهاتنە گۆتن و من ژی گەلەک تەماشە کرییە”.
ب ئەڤێ چەندێ ژی وەسا خۆیا دبیت کو حەزا هونەری هەر ل زارۆکینییێ ل دەڤ ئەوی پەیدابوویە.
(سەباح حەسەن ساڵح) ی گۆت ژی “من ل زارۆکینییا خۆ، پتر حەز ل سەر گۆتنا سترانێن زمانێ تورکی هەبوویە”. ئەڤە ژی بۆ هندێ ڤەدگەڕیت کو مە گەلەک دەزگەهێن ڕاگەهاندنا کوردی ل ئەوی دەمی نەبووینە.
(سەباح حەسەن ساڵح) ی وەسا دا دیار کرن کو د قۆناغا خۆیا ناڤنجی یا خواندنێدا پتر دەرفەتا ستران گۆتنێ هەبوویە. ئەڤە ژی ژبۆ پشتەڤانیکرن و پالپشتییا هەڤالێن ئەوی بوویە.
گۆت ژی ” من ل سەر کورسییا پولێ (ڕەحلەی)ڕیتم و ئاواز دژەنین و ستران دگۆتن. دیسان هەر ئاهەنگ و سەیرانەکا ل قوتابخانەیێ هەبایە، من ستران دگۆتن”.
ئەڤ گەنجێ خودان شیان و ژێهاتی د تەمەنێ پازدە سالییێدا، ل سالا ٢٠٠٦ ێ ل زاخۆ بوویە ئەندام د تیپا (دلمان) یا هونەرمەندێ مەزن (محەمەد تەیب تاهر) یدا. هەروەسا د هەمان دەمدا ئێکەم هەلبەست کو ب ناڤێ (دلێن بێـمراد) نڤیسییە.
دبێژن دلێن نازک ناگه هن مرادا
بۆچی مرادێن وان دمینن دلێ واندا
دێ دوعا کم ژ ته ئەرێ ئەی خودا
مە ژی بگەهینه مرادێن ددلدا
ئاخ دلێن بێ مراد بۆ دلێن بێ مراد
ل سالا ٢٠٠٨ ئانکو پشتی دوو سالان، ئەڤ هەلبەستە ل ستۆدیۆیا زاخۆ تومار کرییە کو ئێکەم کارێ هونەری یێ ئەوی بوویە. ب دەرهێنەراتییا (میکایل ئەرەدنی) هاتییە کلیپ کرن.
هەروەسا چەند پرسیار و بەرسڤ دچاڤپێکەڤتنا من ل گەل مامۆستا و هونەرمەند (سەباح حەسەن ساڵح).
پرسیار/ تو ئاستێ هونەرێ مۆزیک ل نوکە، د چ ئاستدا دبینی؟
بەرسڤ/ ل جیهانێ هەمییێ مۆزیک گەهشتییه ئاستێن هەری باش. ل وەلاتێ مه ژی ب هەمان شێوه. ژلایێ کوالێتییا مۆزیکێ و مۆزیکژەناڤه د ئاستەکێ باشدایه، لێ ل زاخۆ هێشتا ئەو ئاستێ تەکنیکا دەنگی و کوالێتییا ستۆدیۆیا د ئاستەکێ سەرەتایی یان ناڤنجیدایه. هەروەسا ڤالاهییەکا تەواو یا ئەکادیمی هەیە. ژبۆ هندێ ڤەدگەڕیت کو
زاخۆ پەیمانگەهەکا هونەرێن جوان نەبوویە. لەوڕا مایە ڤالاهی. ب ئانەهییا خودێ ئەم وەکو قوتابییێن پەیمانگەها ڤیا هونەرێن جوان پشکا مۆزیکێ دێ ئەوێ ڤالاهییێ داگرین.
پرسیار/ گەنجان حەزا ئەڤی هونەری هەیە. پالپشتی ژبۆ ئەوان دهێتە کرن.
بەرسڤ/ بێگۆمان بەهرەیا هونەری وەکو هەمی بەهرەیێن دی ل گەل هەبوونا مرۆڤی بۆ ژیانێ، خودایێ مەزن ل دەڤ مرۆڤی پەیدا دکەت و ب مرۆڤی دبەخشیت، لێ ب مخابنیڤە، دێ بێژم هەوە کو ئاستەکێ پێدڤی گرنگی بەهرەیا کەسێن بەهرەمەند و حەزا ئەوان ناهێت دان.
ئەز خۆ بکەم میناکەک سەرەڕای ئەوان هەمی بەهرە و مهاراتێن ل دەڤ من هەین ژ دەنگی، نڤیسینا هەلبەستێ، دروستکرنا ئاوازێ و ژەنینا ئامیران بگرە ل دەڤ من یێن هەین، لێ هەتا نوکە وەکو پێدڤی و ل دویڤ ئەڤان مهاراتێن من، چ تشتی ژ هەژی شیانێن من بۆ من نەهاتینە کرن. ژلایێ چ کەسێ و چ جهەکێڤە بەروڤاژی پێکۆل یێن کرین ئاستەنگان ژبۆ من دروست بکەن! بەلێ ئیرادە بۆ گەنجی گەلەک دەستان دانەهێلت. هەتا دووماهیکێ و کارێ خۆ ب نیڤی ئەنجام نەدەت.
پرسیار/ هونەرێ مۆزیکێ چ دگەهینیت؟
بەرسڤ/ ژلایێ تەکنیکێڤه مۆزیک، تون و ڕیتمە.
ژلایێ زانستیڤه مۆزیک هونەره و د هەمان دەمدا زانسته. وه کی هەر زانستەکێ دی یێ جیهان دخوینن یاسا و بنەما لق و پشکێن خۆ هەنه. وەک زانستێ بیرکارییێ فیزیاییێ، لێ یا مۆزیکێ نوتەیه و ب دەنگه.
ژلایێ دەروونیڤه مۆزیک خوارنا گیانیه، ئارامکەره ژبۆ مێشکی، لێ مۆزیکا ژەنینا ئەوێ یان ئاوازا ئەوێ یان ژی ئەو ئامیره، ئارامکەر بیت بۆ دەروون و جەستەیێ مرۆڤی. (ئەگەر تو قەستا بەر لێڤا دەریایەکێ بکی و دهنگێ پێلێن ئاڤێ و ل گەل تێکەلبوونا ده نگێ بالندان)
ما دێ چەند مۆزیکەکا ئارام ب مرۆڤی بەخشیت.
بەروڤاژی قەرەبالغییا مرۆڤا و ترۆمبێلا یا د بازاڕیدا چەند مۆزیکەکا نەئارام ب مرۆڤیدبەخشیت). ژلایێ جڤاکیڤە، مۆزیک پەیامەکا مرۆڤایەتی و ئاشتییێیه مللەتان و کەلتووران دگەهینت ئێک.
ب دیتنا من، ل باژێڕێ زاخۆ ئاستێ هونەرێ مۆزیکێ ژلایێ گەنجانڤە بەرەڤ بلنبوونێڤە دچیت، لێ د هەمان دەمدا چ گرنگی پێناهێتەدان. هەروەسا مامۆستا و هونەرمەند (سەباح حەسەن ساڵح) گەلەک پالپشتێ ئەڤی هونەرێ پیرۆز ل ناڤ گیانێن گەنجێن بەهرەمەندا یێ هاریکارە. ژ بۆ ئەوان گەنجێن ئەڤ بەهرەیا پیرۆز ل ناڤا گیانێن ئەواندا ئاڤابووی، کار بکەن و بێی هیڤی نەبن. کەسانێن وەکی مامۆستا و هونەرمەند
(سەباح حەسەن ساڵح) ی، د ناڤا ئەڤی هونەریدا هەبن. دێ هەردەم پالپشت و هاریکاری ئەوێ هیڤیا هەوە بیت.
سوپاسییەکا بێ سنوور ژبۆ مامۆستا و هونەرمەند (سەباح حەسەن ساڵح) ی دکەم کو ل گەل مە هەڤکاربوویە.
گەنج چریسکە،
لێ ڕۆنەهییەکا ڕۆن ژێ دباریت.
Comments are closed, but trackbacks and pingbacks are open.