رێکخراوا وەرار یا گەشەپێدانا لاوان ل ڤان دوماهیان دا شیایە جهێ خۆ بکەت دناڤ چینا گەنجان دا کو رادبیت ب ئەنجامدانا چالاکیان چ بشێوەیێ ئۆنلاین بیت یان ئۆفلاین برێکا راهێنەر و شارەزا دبوارێن جودا جودا دا.
ئەڤ رێکخراوە ل دەستپێکێ ل ٢٠٢١/١٠/١٢ بناڤێ رێکخراوا ژین یا گەشەپێدانا گەنجان لسەر بنەمایێ ئۆنلاین هاتە دامەزراندن .
ب بۆرینا دەمی ل ٢٠٢٣/١/١٦ ئەڤ رێکخراوە بشێوەیەکێ فەرمی ژ لایێ فەرمانگەها رێکخراوێن نەحکومیـڤە هاتە تۆمارکرن ب ناڤێ رێکخراوا وەرار یا گەشەپێدانا لاوان.
رێڤەبەرێ رێکخراوێ بەرێز بلند بەهجەت بۆ مە گۆت : هزرا دامەزراندنا رێکخراوا وەرار دزڤریت بۆ چەند گەنج و لاوان کو ب رێکا ڤێ رێکخراوێ خزمەتەکێ پێشکێشی گەنج و لاوێن وەلاتی و بتایبەت دەڤەرا بادینان بکەت.
هەروەسا هەیکەلێ رێکخراوێ ژ چار قۆناغان پێکدهێت کو قۆناغا سەرەکی ئەنجومەنێ سەرکردایەتیا رێکخراوێ یە، قۆناغا دوویێ بەرپرسێن بەشان، قۆناغا سێ یێ کارگێریێن رێکخراوێ نە، قۆناغا چارێ ئەندامێن رێکخراوێ نە.
ناڤهاتی زێدکر و گۆت کو رێکخراوێ تا نوکە چ بارەگایێن فەرمی نینن لێ ل پاشەرۆژێ دا ئەگەر بارەگا هەبوو دێ سەنتەرێ وێ ئاکرێ بیت و نوکە ژی رێکخراوێ چەندین لەقێن هەین ل ئاکرێ و دهۆک و زاخۆ بەلێ تا نوکە چ بارەگایێن فەرمی نینن.
هەروەسا گۆت ژی کو رێکخراوا وەرار یا نەحکومیە و بێ لایەنە و قازانج نەویستە و هەتا نوکە داهاتێ وێ تنێ ل چالاکیێن وێ دهێت و هەتا نوکە هیچ لایەنەکی هاریکاریا وێ نەکریە بەلێ مە بەشەکێ هەی یێ تایبەتە ب دەستڤەئینانا بەخشینان کو کارێ وێ نڤیسین و پێشکێشکرنا پرۆپۆزەلایە ژ بۆی جیهەتان و مە چەند پرۆژە یێن پێشکێشکرین.
هەروەسا مە ڤیا بزانین کا چالاکیێن رێکخراوێ ژ چ پێکدهێن؟ و د چ بوار دانە؟ و تا نوکە وە شیایە چەند چالاکیان ئەنجام بدەن؟
بلند بەهجەت: هەر ل دامەزراندنا رێکخراوێ تا نوکە چەندین چالاکییێن هاتینە ئەنجامدان مینا پرۆژێ ژورا ژێدەرا بۆ خودان پێتڤیێن تایبەت ژ لایێ رێکخراوێ ڤە هات ڤەکرن و پرۆژێ سمینار بۆ جارا دوویێێ و نوکە ژی یێ بەردەوامە و پرۆژێ ژیندا یێ ئاڤاکرنا دەرونەکێ باشتر کو دنوکە دا یێ بەردەوامە و ب دەهان خۆل و بدەهان سمینارێن جۆراوجۆر ل بوارێن گەشەپێدان و دەرونی و هشیاری و پەروەردەی و راگەهاندن و کۆمپیوتەر. هەروەسا بەریکانە و کارێن خێرخوازی و دیدار و پەنەل و جۆرەها چالاکیێن دی.
و لدوماهیێ ژی بەرێز بلند بەهجەت رێڤەبەرێ رێکخراوا وەرار گۆت کو داخوازیا مە ئەوە جیهەتەک هاریکاریا مە بکەت کو ئەو خزمەت و ئارمانجێن مە هەین ل ناڤا وی بارەگایدا ئەنجام بدەین کو چەندین خزمەتگۆزاریێن جۆراوجۆر بخۆڤە دگریت.
ئەم ژی وەک دەزگەهێ میدیایێ زێ بادینان دەست خۆشیێ لکار و چالاکیێن هەوە دکەین و گرنگیدانا وە بۆ تەخا گەنجان بەرز رادگرین و هیڤیدارین بشێن برێکا دەزگەهێ زێ بادینان داخوازیا وە بگەهینین جهێن بەرپرس.
نورهان علی ـ دەزگاهێ میدیایێ زێیێ بادینان 2023/11/3
Comments are closed, but trackbacks and pingbacks are open.