په‌رله‌مانتار: ژیان طاهر زێوه‌ی
ژ ره‌وشت و تیتالێن هه‌ره‌جوانێن كو هنده‌ك ژ رێبەرێن ملله‌تان پێ دبنه هێما و نموونێن سه‌ركردێن خوشتڤی و سه‌ركه‌فتی دناڤ ملله‌تێ خودا، وه‌فا، پاكی و خه‌مخوریا وانه ل هەمبەر گه‌لێ خو. نموونەکا هەری سەرکەفتی بۆ ڤێ چەندێ كاك ئدریس بارزانی بوو کو خودان ره‌وشته‌كێ به‌رز و كه‌ساتیه‌كا وه‌فادار و خه‌مخورێ ملله‌تێ خو بوو و هه‌رده‌م هاریكار و پشته‌ڤانێ خه‌لكێ خو بوو. نه‌خاسمە بو شورشگێر، خه‌باتكار و ئاواره‌یان چ جارا درێغی نه‌دكر. من پێ خوشە وەک میناک ڤێ بیرهاتنا تایبەتا مالباتا خو بۆ خوینەران بڤەگێرم:
ئه‌م وه‌ك هزاران مالباتێن كورد پشتی شکەستا ۷٥ێ ئاواره‌ی ئیرانێ بووین و ل باژێرێ ته‌بریزێ ئاكنجی بووین. شورەشگێر و خودان باوه‌رێن رێبازا پیروز ل دەستپێکا ئاوارەییێ و د گه‌رمه‌گه‌رما بێهیڤی بوونێدا ل بهانه‌یه‌كێ دگه‌ریان كو دلێ خۆ پێ خوش كه‌ن و باوه‌ریه‌كێ بۆ خو چێكه‌ن كو شورەش دێ یا به‌رده‌وام بیت. رۆژنامه‌كا ئیرانی ل وان روژان گوتاره‌ك لسه‌ر بزاڤا كوردی و بارزانیێ نه‌مر دگەل وێنەکێ وی به‌لاڤ کربوو. بابێ مە، طاهر زێوه‌ی، و كومه‌كا كوردێن ئاوارە ل تەبریزێ ل جهه‌كی خرڤه ببوون و هه‌رچه‌نده نه‌دزانی رۆژنامێ ب چ شێوه به‌حسێ شورەشێ و بارزانیێ نه‌مر كریە، لێ دیسا ژی ب دیتنا وێنێ بابێ روحیێ نه‌ته‌وا كورد گه‌له‌ك دلخوش ببوون و ب هیڤی و ئومێد به‌حس ل هندێ دکر كو رێبازا وی دێ یا به‌رده‌وام بیت. لێ مخابن هەر وەک چاوا جاش و خۆفروش د دیروكا كورداندا ئه‌گه‌رێن سه‌رەكیێن شکست و بێهیڤیبوونا گه‌لێ مه و سه‌ركه‌فتنا دوژمنی بوونە، ل وێ رۆژێ ژی د ناڤ وێ كوما ئاواره‌یاندا كورده‌ك هه‌بوو كو به‌ری ۷٥ێ چووبوو ئیرانێ و باش فێری زمانێ فارسی ببوو. وی ل شوینا هندێ كو بۆ هه‌ڤالێن خو راڤه بكه‌ت كا چ به‌حسێ شورەشێ و بارزانیێ نه‌مر د رۆژنامێدا هاتیه كرن، سڤكاتی ب كه‌یفخوشیا بابێ مە و هه‌ڤالێن وی کر و گوتێ: «ڤێجا چیه، هه‌ر كه‌سه‌كێ پارا بده‌ته رۆژنامه‌كێ، دێ وێنێ وی به‌لاڤ کەت؛ بارزانی و شورەشا وی ژی بتنێ بوو ئه‌گه‌رێ مالوێرانی و ئاواره‌بوونا وه. كه‌یفا خۆ نه‌ئینن، چ شورەش نه‌مان…». ئه‌ڤ ئاخفتنا كابرای دناڤ وێ كوما هه‌ڤالێن بابێ مه‌دا كو پرانیا وان پێشمه‌رگێن ئیلونێ و مریدێن رێبازا بارزانی بوون، بوو ئه‌گه‌رێ درستبوونا توڕه‌ییه‌كا ئێكجار مه‌زن لده‌ف بابێ مە. لەوما دەم ل دەست خو ل كابرای دا و ئەو ب توندی بریندار کر. كابرای ژی وه‌كی تولڤه‌كرنه‌كێ ل بابێ مه گووتە حكوومه‌تا ئیرانێ كو طاهر زێوه‌ی سیخورێ ئه‌مریكایه و ژبەر کو من به‌حسێ ئه‌مریكا ب خرابی كر ئه‌وی خو راکێشا من و ئه‌ز بریندار كرم. لەوما حكوومه‌تا ئیرانێ ره‌حمه‌تی بابێ مه، بێی كو ئاگه‌هداریا مالا مه بهێتە کرن، ده‌سته‌سه‌ر كر. دەیكا مه هزر دكر ئه‌و بشه‌ڤ مایه ل مالا هه‌ڤالەکی و نه‌دزانی چ بسه‌ری هاتیە. هه‌ڤالێن وی ژی بێی كو ئاگه‌هداریا وێ بكه‌ن، بلەز خو گه‌هاندبوو ره‌حمه‌تی كاك ئدریسی و جه‌نابێ وی لسه‌ر بابه‌تی و ره‌وشا بابێ مه ئاگه‌هدار كربوو. پشتی دوو رۆژان بابێ مه هاته بەردان و ڤەگەریا مال. ده‌یكا مە د گووت ئه‌و گەلەک بێچاره ببوو و هاتبوو ئەشکەنجە دان و سه‌روچاڤ و گەلەک جهێن له‌شێ وی بریندار ببوون. ئه‌وێ نه‌دزانی مه‌سه‌له چیه حه‌تا كو هه‌ڤالێن وی هاتین سه‌را وی دای و سلاڤێن ره‌حمه‌تی كاك ئدریسی گه‌هاندینێ و دیاریا جه‌نابێ وی پێشكێشی بابێ مه كری. هینگێ دەیکا مە زانی هه‌ڤژینێ وێ ب شكایه‌تا خوفرۆشه‌كی و بۆ تاوانەکا نه‌كری هاتبوو ده‌سته‌سه‌ركرن و ب هه‌وڵ و بزاڤێن كاك ئدریسێ جانه‌مه‌رگ د ماوێ ٤٨ ده‌مژمێران دا هاتبوو ئازاد كرن.
كاك ئدریس ڕێبەرەک و قوتابیه‌كێ راسته‌قینه‌یێ رێبازا پیرۆزا بارزانی بوو، هه‌روه‌ك جه‌نابێ لێڤه‌گه‌رێ كوردان سه‌روك بارزانی ژی د یاداشتا خودا بڤی ئاوایی به‌حسێ وی دكه‌ت و دبێژیت:«ئه‌و خه‌مخورێ هه‌ژاران و لیقه‌ومیان، نموونه و هێمایێ ره‌وشت به‌رزیێ، وه‌فا و پاكیێ و راستیێ بوو.»
هزار سلاڤ ل گیانێ پاكێ کاک ئدریسێ هه‌رده‌م ساخ و هه‌می شه‌هیدێن رێیا ئازادیێ و سه‌ركاروانێ وان بارزانی نه‌مر بن. گیانێ وان شاد، گورێن وان پرنوور و رێبازا وان یا به‌رده‌وام بیت.
- دکاری هەموو بابەتین خۆ ببینی ….
Comments are closed, but trackbacks and pingbacks are open.