پێشگۆتن
هەلبەست ئەو ژانڕێ وێژەییە، یێکو سەدان سالە ل کوژییێن دیرۆکا کوردی جهێ خۆ کری و هەردەم و ساتەکێ هندەک تاکێن کورد ژبۆ پاراستنا زمان و دیرۆکا گەلێ کورد هاتین، هەروەسا وێژەیا کوردی خۆ ل ئەوی ژانڕی کرییە خودان و ل دویڤ شیانێن خۆ هەولداین پەیاما خۆ بگەهینن. وێنەیێن هەلبەستا کوردی ژبەر هەبوونا کێشەیێن سیاسی و جوگرافی ل سەر خاکا کوردستانێ پتریا جاران سیمایەکێ شۆڕەشگێرانە و سیاسیانە ل سەر دیاربوویە و بەردەوام ململانا هێزێن جیران ل سەر داگیرکرنا کوردستانێ بوویە، کو بوویە هۆکار بۆ هەستێن تاکێ کورد ژبۆ خەباتا کوردایەتییێ بهێنە دارشتن، وەک (سەرۆک بارزانی) گۆتی: ((دەنگێ فیشەکان بوویە مۆزیک ژبۆ کوردان)).
زەنون سلێڤانەیی، ئەو نڤیسەرێ بەردەوام حەزا نڤیسینا هەلبەستا کوردی د مێشک و دلێ ئەویدا و بۆ ماوەیێ چەندین سالە د پێناڤا هەلبەستا کوردیدا دنڤیسیت، خزمەتا وێژەیا کوردی دکەت و ل ئەڤێ دووماهییێ دیوانا هەلبەستێن ئەوی یێن کۆمڤەکری ب ناڤێ (پاپۆڕا ژیانێ) گەهشتییە بەردەستێ من، پشتی خواندنا هەلبەستێن ئەوی ژبۆ بابەتێن دلداری، وەلات، زارۆک و چەندین بابەتێن دی د ناڤ هەلبەستێن ئەویدا د دیار و ئاشکەرابوون. ل دۆر وەلاتی پەسنا شۆڕەشا کوردی و فاکتەرێ سەرهلدانا شۆڕەشا کوردی (بارزانییێ نەمر) کرییە.
زەنون سلێڤانەیی وەک (نڤیسەر و پێشمەرگە) شیایە ب چەک و پێنۆسێ خۆ خزمەتا وەلاتێ خۆ بکەت، بەلی د هەمان دەمدا هندەک وێنەیێن جوان ل سەر تابلۆیا هەلبەستێن خۆ نەخشاندییە و بۆ ماوەیێ چەندین سالە بەردەوام دنڤیسیت، ئەڤە ژی خزمەتەکا کێم نینە ژبۆ وێژەیا کوردی، ژبەرکو زەنون سلێڤانەیی هەلبەستڤانەکە (ژبەر خۆ دەرکەڤتییە) و هیچ خۆلەکەکا زانستی ل دۆر بابەتێن نڤیسانا هەلبەستێ وەرنەگرتییە، ژبەر ئەڤێ چەندێ تا ئاستەکێ شیایە ئاستێ خۆ باش دیار بکەت و هەلبەستڤانەک ب ئەڤی شێوەیێ پێدڤی خۆلێن پێشکەڤتیترە د ئەڤی بواریدا کو ب ئەوان هزرێن سەرێ خۆدا کەلهێن جوانێن هەلبەستێ ئاڤا بکەت. ب تایبەت ژ لایێ (کێش و سەروایێ)ڤە پێدڤی ب خۆئاڤاکرنێیە.
دەستخۆشییێ ل ناڤهاتی دکەم و داخوازا بەردەوامی و سەرفەرازییێ بۆ دخوازم.
نڤیسەر / سالار محمد فتاح
(دیرزان )
Comments are closed, but trackbacks and pingbacks are open.