مستەفا كازمی سەرۆك وەزیرێن عیراقێ هەڵویستێ خۆ لسەر قاسم موسلحی ئەو فەرماندێ حەشدا شەعبی كو ب بڕیارا دادگەهێ هاتییە دەستەسەركرن ڕاگەهاند و كازمی دووپاتكر كو لیژنەكا ڤەكۆلینێ دێ لسەر موسلحی هێتە پێكئینان.
د ڕاگەهاندنەكێدا سەرۆك وەزیرێن عیراقێ خۆیاكر، هێزەكا ئەمنییا تایبەت ب فەرمانا فەرماندێ گشتیێ هێزێن چەكدارێن عیراقێ یاداشتەكا دادوەری بۆ دەستەسەركرنا قاسم موسلحی جێبەجێكر، كو ناڤبری تاوانبارە ب ماددێ 4 یێ تیرۆرێ و سكالا لسەر هاتییە تۆماركرن، و سەرۆك وەزیرێن عیراقێ دازانین، كو لیژنەكا ڤەكۆلینێ یا پێكهاتی ژ فەرماندێ ئۆپڕاسیۆنێن هەڤپشك و هەواڵگێرییا ناڤخۆ، هەواڵگێریا سەربازی، ئاسایشا نیشتیمانی و ئاسایشا حەشدا شەعبی هاتییە دروستكرن بۆ ئەنجامدانا ڤەكۆلینان دگەل قاسم موسلحی و كازمی دووپاتكر كو تاوانبار نەهاتییە ئازادكرن.
دەربارێ وێ دیردا چەكداری ئەوا ل دەڤەرا كەسك پەیدابوویی، سەرۆك وەزیرێن عیراقێ راگەهاند، ئەو دیاردە پێشلكاریەكا مەترسیدارە لسەر دەستوور و یاسایێن كارپێكری، فەرمان ژی دەرچووییە بۆ دیڤچوون و دەستەسەركرنا ئەنجامدەرێن وان ڤەلڤینان.
قاسم موسلحی فەرماندێ ئۆپڕاسیۆنێن حەشدا شەعبی بوو لپارێزگەها ئەنبار، ب تاوانا كوشتنا چالاكڤانێ مەدەنی ئەیهاب وەزنی ل پارێزگەها كەربەلا ژلایێ هێزێن ئەمنیێن عیراقێڤە هاتە دەستەسەركرن، پشتی دەستەسەركرنا موسلحی هێزێن حەشدا شەعبی چوونە دناڤ باژاڕێ بەغدا دا و دەڤەرا كەسك دوورپێچكر، لهەمبەر وێ چەندێ ژی سەرۆك وەزیرێن عیراقێ ڤەلڤین ب سوپای كرن و تانك و زریپۆش ڕەوانەی دەڤەرا كەسك كرن.
Comments are closed, but trackbacks and pingbacks are open.