نڤیسەر ماموستا، شیان مەهدی کانیسارکی
دەمەکێ ل گۆندان خەلک هند یێ پێچێبووی”زەنگین” نەبوو، ئەگەر تە نەکربا تە نەدخوار” گای دکر و گای دخوار” ئەڤجا ژیانا وان ئەز نابێژم ب زەحمەت بەلێ ب دەستێن شەق شەق و کولبوی ڤە دەربازدبوو. هەر گۆندەکی شڤانێ خۆ یێ تایبەت هەبوو” د چوو بەر پەزێ وان” هەروەسان بێی”گاڤانێ” ژی نەدچوو سەری، چونکی گەلەک مالان “چێل، گولک، گا، هەسپ و گۆهدرێژ” ژی هەبوون دڤیابا ئێک هەبا چاڤێ خۆ دابایێ بربا چەرەکێ، دەمێ کەسەک د هاتە هەلبژارتن بۆ گاڤانیا گۆندی( وەکی نوکە نەبوو موچەکی ل دویماهیا هەیڤێ بدەنێ) دا بێژن:” هەر مالەک(ئەڤێن گیانەوەرێن وان لدەف) دڤیابا فلان ڕۆژێ دانەکێ خوارنێ بۆ (گاڤانی و خێزانا وی) پەیدا بکەت، بۆ نموونە ئەز دا بێژمێ فراڤینا دوزابا ژمن….و هوسا سرا لدور گۆندی دزڤری هەتا هەیڤ کامل دبوو. ئەڤجا دا ئەڤرۆ ئێڤاری گاڤان گیانەوەران ئینیت و “داکەت” و دا ئامانەکی”قازانەکێ” بەت یان دا بێژیت کەسەکی هەرە بینە، دا چیت مال مال کا چ خوارن چێکرە دا تێرا وی و زارۆکێن وی پیچەکێ کەن وی ئامانی، دا چیتە مالا ئێکێ بۆنموونە: برنج یا چێکری دا پیچەکێ کەت بنێ قازانا وی، مالا دووێ نیسک یا چێکری دا وێ ژی کەت سەر برنجێ، مالا سیێ دبیت قەلی بیت دا وێژی کەن سەر….هتد و هوسا کا وێ ڕۆژێ چەند مال دورا وانە.
“د گۆتنە ڤێ تێکەلا خوارنێ: گێلما گاڤانی”
بۆ بابەتێ ئێک ئامان ژی کا بۆچی هەر مالەکێ ئامانەکێ جودا نەدبر؟ مە ل دەستپێکێ گۆت ب چاڤێ نوکە ئەم نەشێین تەماشەی ژیانا وی دەمی بکەین، چونکی کەسێ پێ چێنەدبوو پێنج ئامانا بکریت و ببەت دا خوارنێن وی جودا جودا بن، ئەگەر بارێ وی یێ باش با دبیت گاڤانی نەدکر. ئەڤجا خوارن هەمی دچوونە ناڤ ئێک(د گۆتنە ڤێ تێکەلا خوارنێ: گێلما گاڤانی) و وەسا دا بۆ زارۆکێن خۆ بەت دا بخۆن. پاشی ئەو گۆتن دناڤ خەلکێ ژی دا بەلاڤبوو و دەمێ کەسەک سوحبەتان دکەت ناڤ ئێک یان بابەتان تێکەل دکەت یان ئێک ل شوینا کارەکی ب ڕێک و پێک بکەت ڕابیت هەمیێ سەرێک و بن ئێک بکەت دێ بێژنێ( ئەڤە تەکرە گێلما گاڤانی)ئانکۆ تە هەمی تێکەل کر.
- دکاری هەموو بابەتێن خۆ ببینی لێرە ….
Comments are closed, but trackbacks and pingbacks are open.