په‌رله‌مانتار: ژیان تاهر زێوه‌ی
زاروك دایك و بابێن خۆ ب مەزنترین پشته‌ڤان و هیڤی و ئومێدا خۆ دزانن و وه‌سا هزر دكه‌ن كو كه‌س ل جیهانێ نه‌شێت به‌رهنگاری وان ببیت و هه‌رده‌م لبن سیبه‌را وان دێ ژ هه‌می مه‌ترسیێن ژیانێ د پاراستی بن. من ژی ل زاروکیا خو دایك و بابێن خۆ مینا چیایه‌كی ددانان و من هه‌رده‌م هزر دكر چ كه‌س و چ تشت نه‌شێن وان لاواز بكه‌ن. ل بیرا منه ده‌مێ ژیێ من ٥ سال، د رۆژه‌كا وه‌كی ئه‌ڤرودا ژ نشكه‌كێڤه من دیت دایكا من، ره‌حمه‌تی داپیرا من و ره‌حمه‌تی بابێ من ده‌ست ب گری كرن و به‌رده‌وام دگوتن: «پشتا مه شكه‌ست، ئه‌م ماینه بێ خودان». ئه‌ز گەلەک ترسام و جیهان لبه‌ر چاڤێن من تاری بوو. ئێكه‌م جار بوو من ئەو وه‌سا شه‌پرزه و بێرێ ددیتن. من پرسیارا ژ دایكا خۆ كر كا چ چێ بوویه. د به‌رسڤێ دا گووت: «بابێ مه‌زن بارزانی وه‌غه‌ر كر و ئه‌م هێلاینه بێ خۆدان». من نه‌دزانی بارزانی كیه، به‌لێ پا ئه‌و ناڤ ما د هزرا مندا و پشتی كو من فه‌هم كری تازه من زانی كو بارزانی ئه‌و كه‌س بوو یێ كو د تاریاتیا شه‌ڤا زولم و زورداریێ دا خەتیرا شورەشێ و هیڤیا پاشه‌روژێ و هه‌ست ب هەبوونا خو کرنێ لده‌ف گه‌له‌كێ سته‌م لێكری و بێ ده‌ستهه‌لات هل كری. بارزانیێ نه‌مر هێما و ناسنامه‌یا گه‌لێ مەیە. هه‌می ژیانا خۆ ته‌رخان كر ژ بۆ بده‌ستڤه ئینانا دادپه‌روه‌ریێ و یه‌كسانیێ و ڤه‌ژیانه‌كا ئازادانه و ژ هه‌ژی بۆ گه‌لێ خۆ و مینا بابه‌كی خو ل گه‌لێ كوردستانێ كرە خودان و خورتێن كوردستانێ فێری ئازادی، نیشتمانپه‌روه‌ری و دیموکراسی و خۆپێگەهاندنێ کرن. راسته كو وه‌غه‌را وی دلشكه‌ستن و تاریاتیه‌ك دناڤ ژیان و هیڤیێن گه‌لێ كورد دا درست كر، به‌لێ پا رێبازا وی ما ساخ و نەمر؛ ژ روژا وەغەرا وی وەرە رێبوارێن وێ رێبازا پیروز ب رێبەریا سەروک مەسعود بارزانی بێراوەستان خەباتێ ژبو بجهــ ئینانا ئارمانجێن بابێ روحیێ نه‌ته‌وا كورد دکه‌ن.
سلاڤ ژ بۆ گیانێ پاكێ بابێ نه‌ته‌وا كورد بارزانیێ نه‌مر و ئدریسێ هه‌رده‌م ساخ. سه‌رێ رێز و نه‌وازشێ ل هه‌مبه‌ر ماندیبون و خو گوریكرنا ئه‌فسانه‌یێ چیا و هه‌می شه‌هیدێن رێیا ئازادیێ د چه‌مینم. رێبازا وی یا به‌رده‌وام بیت و سه‌ركه‌فتن بۆ رێبوارێن ڤێ رێبازێ بیت.
- دکاری هەموو بابەتین خۆ ببینی …
Comments are closed, but trackbacks and pingbacks are open.