وەزارەتا پەروەردێ ل گورەی ئەزمونێن تەمامکاری یێن خولا دووێ بۆ پۆلا ١٢ نڤسینەک بەلاڤکر

دەزگەهێ مێدیایێ زێ بادینان:

وەزارەتا پەروەردا هەرێما کوردستانێ د نڤیسارەکێدا دەمێ ئەنجامدانا ئەزمونێن تەمامکاری یێن خولا دووێ بۆ وان خوێندکاران ڕاگەهاند کو بسەدەمێ کۆرۆنایێ نکارینە پشکداری ئەزمونان ببن.

وەزارەتا پەروەردا حکومەتا هەرێما کوردستانێ د نڤیسارەکێدا ئاماژە ب وێیەکێ کریە ئەزمونێن تەمامکاری یێن خولا دووێ بۆ پۆلا ١٢ ل ٣٠ی ڤێ مەهێ دێ هێنە ئەنجامدان و پێتڤیە پەروەردە هەیا ٢٧ی مەهێ زانیاریێن تەمام دەربارەی وان خوێندکاران بهنێرن بۆ وەزارەتێ.

لدویف نڤیسارێ، پێتڤیە خوێندکاری پشکداری ئەزمونێن خولا دووێ نەکربیت و راپۆرتا نوژداریا پەسەندکرییا سەنتەرێن کۆرۆنایێ هەبیت و بسەلمینیت کو ددەمێ ئەزموناندا توشی کۆرۆنایێ ببوو.

ئەوژی دیارکریە، ئەو باژێرێن کو ڕێڤەبەریێن گشتیێن پەروەردێ لێ هەنە، هۆلێن ئەزمونان دێ بۆ هێنە تەرخانکرن و ئەزمونان د وان بابەتان دا بکەت یێت کو ئەزمون پێ نەکرین، ل دەمژمێر ٨:٣٠ خولەکی سپێدێ ئەزمون دێ دەستپێکەن.

ل هەرێمێ دوو رەنگێن ئەزمونێن نشتیمانی هەنە، کو بریتینە ژ ئەزمونێن پۆلا ٩ و پۆلا ١٢ێ؛ ئەزمونێن پۆلا ١٢ ب ئێک ژ ئەزمونێن سەرەکیێن هەرێما کوردستانێ دهێنە دانان و پرسیار ژ ئالیێ وەزارەتا پەروەردێ دهێنە دانان و بۆ هەمی کوردستانێ وەک ئێکن.