خورشید ئەحمەد سوورچی
ل ١٣/ئازارا/٢٠١٤ـێ، لدەمێ هێرشا داعش بۆ سەر ئێراقێ ب فەتوایەکا جیهادی حەشدا شەعبی هاتە دامەزراندن، حەشد ژ کۆمەکا هێزێن شیعی یێن چەکدار پێکهاتیە کو بەری شەڕێ داعش هندەک ژوان هێزان بخۆ دگەل ئێک د ناکۆک بوون، لێ دەما داعش دهێت و شیعە هەست ب مەترسیەکا مەزن دکەت و داعش دبینیت پلانەک ب دژی هیلالا شیعی، ئێکسەر ب چاڤدێریا ڕاستەوخۆ یا (قاسم سولەیمانی) فەرماندێ فەیلەقا قودسا ئیرانی و (عەلی سیستانی) مەرجەعێ شیعەیێن ئێراقێ، ل ١٣/حوزەیرانا هەمان سال، بڕیار هاتە دان کو هەمی هێزێن شیعە ناڤێن خۆ تۆماربکەن دناڤ ڕێکخراوا حەشدا شەعبی، ب مەرەما هندێ شیعە ب ئێک ڕێزی و ئێک دەستی ڕوویبڕی مەزنترین دوژمنێ خۆ ببن. ڕۆژ ب ڕۆژ پێگەهێ حەشدێ بەرفرەهتر دبوو حەتا وەلێهاتی ل سالا (٢٠١٥)ـێ د بودجەیێ عێراقێ دا (٦٠ملیۆن دۆلار) بۆ هاتنە تەرخانکرن و ل سالا (٢٠١٦)ـێ وەک هێزەکا فەرمی هاتە ناساندن، هەروەسا دناڤ دەزگەهێن فەرمی یێن دەولەتێ کار هاتە کرن بۆ سیستەمکرنا حەشدێ لێ یا بێ مفا بوو، چونکی فەرماندە و ئەندامێن حەشدێ تنێ ئاخفتنا (سیستانی) وەردگرن و ئەو ناچنە بن بارێ چ بڕیارەکا سیاسی و سەربازی و کارگێری یا دەزگەهێن فەرمی یێن دەولەتێ.
یاسایا حەشدا شەعبی چیە؟ مەرەم ژێ چیە؟
ل سالا (٢٠١٦) ل پەڕلەمانێ ئێراقێ دەنگ ب پڕۆژە یاسایا حەشدێ هاتە دان و وەک هێزەکا فەرمی یا عێراقی هاتە دانان، د نوکەدا هێزێن شیعی یێن داخاز دکەن ئەڤ یاسایا سالا (٢٠١٦)ـێ بهێتەڤە هەموارکرن و هندەک یاسایێن نوی بهێنە جێگیرکرن و دەرئێخستن، کو ئەڤە هندەک ژوان داخازیانە کو ئەو لایەن داخاز ژێ دکەن (یاسایا خانەنشینیێ بۆ ئەندامێن حەشدێ، تەرخانکرنا وەزارەتەکا تایبەت ب کاروبارێن حەشدێ، تەرخانکرنەکا بودجەیەکێ دیارکری، هتد) ئەڤە هندەک ژوان داخازینە، پێکهاتێن دی ژی یێن عێراقێ یێن نە شیعە ددەنە دیارکرن کو ئەڤ پڕۆژەیە یاسایە دێ بیتە ئەگەر (دەولەتەک دناڤ دەولەتا ئێراقێ) دورست بیت کو ئەوژی دەولەتا حەشدێ یە. لەوڕا ترسا وان گەلەکە ژ پڕۆژە یاسایا حەشدێ ئەو وەسا هزر دکەن مەرەم ژ وێ پڕۆژێ ئەوە حەشد ببیتە هێزەکا مەزنتر ژوێ یا هەی و بهێزتر ببیت، بێگومان ئەڤەژی دێ مەترسیا سەر پێکهاتێن نەشیعی زێدەتر کەت.
هێزێن شیعی یێن پێکۆلا دکەن ئەڤێ یاسایێ تێپەڕینن و حەشدێ بکەنە هێزەکا بهێزتر ژ وێ یا هەی. کارڤەدان یێن پەیدابووین لسەر ئەڤێ یاسایێ، ئەمریکا هەر زی هاتە خەت و ڕاگەهاند ب هیچ ڕەنگەکی چێنابیت ئەڤ یاسایە دەرباز ببیت، هەروەسا پێکهاتێن نەشیعی یێن ئێراقێ ژی د نەڕازینە لسەر ئەڤێ یاسایێ ب تایبەت پێکهاتێ سوونی، چونکی ئەو دبێژن (حەشد یا هاتی بۆ حەلاندنا پێکهاتێن نەشیعی) . ڕەنگە ئەڤە پسیارا مە هەمیان بیت، هەکە ئەڤ یاسایە تێپەڕیت ل پەڕلەمانی دێ چ چێبیت؟
ئەز پێشبینیا ڤان دوو ڕوویدان و گریمانەیان دکەم.
ئێک/ دووبارە سەرهەلدانا داعش. دوو/ لێدانا ڕاستەوخۆ یا ئیسرائیل و ئەمریکا ل عێراقێ ب تایبەت دەڤەرێن شیعی ئاکنجی.
